***ကျွန်မ၏ချစ်သူနှင့် သူ၏ထိုမိန်းကလေး***
ကျွန်မဘဝတွင်အမှားမှန်းသိလျက်နှင့်မက်မက်မောမောကျူးလွန်မိခဲ့သည့်အပြစ်တစ်ခုရှိသည်ဆိုလျင် သူ့ကိုချစ်မိတာပဲဖြစ်မည်။ ရိုးစင်းသောတွေ့ဆုံမှုတစ်ခုနှင့်တိုတောင်းလှသောအချိန်ကာလတစ်ခုအတွင်း ကျွန်မရင်ထဲ လူတစ်ယောက်အခိုင်အမာနေရာယူသွားခဲ့ပုံမှာအနည်းငယ်တော့အံ့ဩစရာ။ ဒါပေမဲ့ ထိုငြိတွယ်မှုသည်ကျွန်မအတွက်နောင်တရစရာမဖြစ်ခဲ့ပါ။ အရာရာကိုစံနှုန်းတစ်ခုနှင့်တိုင်းတာတတ်သောကျွန်မအတွက် သူသည်လိုလိုလားလားချွင်းချက်တစ်ခုပင်ဖြစ်ပါသည်။ကျွန်မစိတ်ကူးယဉ်ဖူးသော မျက်ဝန်းညိုညိုများသူ့ဆီမှာမရှိသည်မှာလဲ ချွင်းချက်တစ်ခု၊ ကျွန်မကိုအုပ်မိုးထားနိုင်သော အရပ်အမောင်းမျိုးမပိုင်ဆိုင်သည်မှာလဲ ချွင်းချက်တစ်ခု၊ သူ၏အညိုဘက်သို့အတော်လေးရောက်ချင်သော အသားအရောင်သည်လည်း ချွင်းချက်တစ်ခု၊ သာမာန်ဘွဲ့လေးတစ်ခုနှင့်ရုံးဝန်ထမ်းဘဝမှာအသားကျနေသောသူ့စိတ်သည်လည်း ချွင်းချက်တစ်ခု၊ အိပ်မက်ကြီးကြီးမမက်တတ်သည်မှာလည်း ချွင်းချက်တစ်ခု၊ လူလတ်တန်းစားဟူသောအနေအထားကို မနဲဖက်တွယ်ထားရသည့်သူ့မိသားစုကျောထောက်နောက်ခံသည်လည်း ချွင်းချက်တစ်ခု၊ အကြီးဆုံးသားတစ်ယောက်အနေနှင့်မိသားစုကိုငဲ့ညှာစဉ်းစားပေးနေရသည့်သူ့အနေအထားသည်လည်း ချွင်းချက်တစ်ခု၊ ဆင်ခြေဖုံးရပ်ကွက်အစွန်အဖျားရှိ မကျဉ်းမကျယ်မြေကွက်လေးထဲမှ ရေနံချေးရောင်ပြယ်လွင့်နေသည့်အမွေဆိုင်အိမ်အိုကြီးအတွင်းတွင်ဆွေမျိုးစုသုံးလေးခုလောက်စုရုံးနေနေရသည့်သူ့အခြေအနေကလည်း ချွင်းချက်တစ်ခု။ ထို များပြားလှသောချွင်းချက်များကို အချစ်ဟူသောအရာတစ်ခုနှင့် ကျွန်မလျစ်လျူရှုနိုင်ခဲ့တော့ ကျွန်မ၏အသိုင်းအဝိုင်းကမိုက်မဲမှုဟုအမည်တပ်ခဲ့ကြသည်။ ကျွန်မ၏လက်ကိုသူဆုပ်ကိုင်ထားချိန်တွင်ထိုမိုက်မဲမှုများသည် မည်မျှချိုမြိန်လှကြောင်းကျွန်မဖြေရှင်းချက်မထုတ်ချင်တော့ပါ။ နှစ်ယောက်သားတွေ့ဆုံခွင့်ရဖို့ကျွန်မဘက်ကဖန်တီးရတာ၊ ချစ်တယ်ဆိုသောစကားကိုကျွန်မဘက်ကပိုသုံးမိတာ၊ ညတိုင် ဖုံးစဆက်ရသူကကျွန်မပဲဖြစ်နေခဲ့တာ၊ သူ့မွေးနေ့ ကိုယ့်မွေးနေ့ သူနှင့်ကျွန်မ၏အမှတ်တရနေ့မှန်သမျှကိုကျွန်မတစ်ယောက်ထဲမှတ်မိနေတတ်တာ၊ စိတ်အခန့်မသင့်လို့စကားများကြတိုင်းမှားမှားမှန်မှန်ကျွန်မဘက်ကပဲအလျော့ပေးရတာ၊ ချိန်းထားသည့်နေရာတွင်အချိန်လွန်သည်အထိစောင့်နေခဲ့ပြီးမှ မိသားစုကိစ္စနဲ့ရှုပ်နေလို့မလာနိုင်တော့ဘူးဟုဖုံးဆက်လာတိုင်း မျက်ရည်တွေနှင့်တိတ်ဆိတ်စွာပြန်လာခဲ့ရတာ၊ လက်ထပ်ဖို့မတောင်းဆိုနဲ့ဦးနော်ဟုသူ့ဘက်ကဆိုလာတိုင်း နာကျင်စွာခေါင်းညိတ်ခဲ့ရတာ။ ဒါတွေကို ' မင်းတစ်ယောက်ထဲငါချစ်ခဲ့ဖူးတာ ' ဟုဆိုသောသူ့ရဲ့သစ္စာစကားအောက်မှာ ကျေကျေနပ်နပ်ပဲ ကျွန်မမေ့ဖျောက်ပစ်ခဲ့ပါသည်။ သူ့ပခုံးပေါ်ခေါင်းမှီပြီး လောကကြီးကိုကျွန်မယုံကြည်စိတ်ချခဲ့ဖူးသည်။ ကျွန်မချစ်သောသူ့ကို သူချစ်သောမိန်းကလေးနှင့်ယှဉ် တွဲမတွေ့ရသေးခင်အထိသူ့စကားလုံးတိုင်းသည်ကျွန်မ၏ရှင်သန်မှုများဖြစ်ခဲ့ပါသည်။ ကျွန်မထက် ငယ်ရွယ်နုပျိုမှုမှလွဲ၍အစစအရာရာ နိမ့်ပါးလွန်းသောထိုမိန်းကလေး၏လက်ကိုဆုပ်ကိုင်ပြီး ပေါ့ပါးပျော်ရွှင်နေသောသူ့ပုံရိပ်မျိုးကိုကျွန်မတို့၏ချစ်သက်တမ်းအတွင်းတစ်ခါမှမြင်တွေ့ခွင့်မရခဲ့သည်မှာတော့ကြေကွဲစရာကောင်းလှသည်။ ဖြေရှင်းချက်တစ်စုံတရာမရှိသောကျွန်မတို့၏ဇာတ်လမ်းသည်တိုးတိတ်စွာပင်ပြီးဆုံးသွားခဲ့ပါသည်။ ကျွန်မသူ့ကိုချစ်ပါသည်။ ထိုမိန်းကလေးသည်သူ၏ရွေးခြယ်မှုဖြစ်ခဲ့သည်။ ရူးမိုက်စွာပင်ကျွန်မသူ့ကိုချစ်နေဆဲဖြစ်ပါသည်။ ကျွန်မဘဝတွင်အမှားမှန်းသိလျက်နှင့်မက်မက်မောမောကျူးလွန်မိခဲ့သည့်အပြစ်တစ်ခုရှိမည်ဆိုလျင် သူ့ကိုချစ်မိတာပဲဖြစ်မည်။
စန္ဒီ ( အဖြူရောင်မိန်းကလေး )
No comments:
Post a Comment