♥မှော်ဆရာမလေး♥
(၁)
ငါ့ကို
အလွမ်းဘဏ္ဍာစိုး ခန့်ပါကွယ်။
(၂)
အချစ်ဆိုတာ မျက်လှည့်တစ်မျိုးပါပဲ။
မင်းက...မျက်လှည့်သေတ္တာထဲကနေ
ငါ့ အိပ်မက်တွေကို ဆွဲဆွဲထုတ်ပြတယ်...။
...ပန်းသီးအပုပ်တစ်လုံး ဖြစ်သွားလိုက်
...ဖဲချပ်တွေ ထွက်လာလိုက်
...ပန်းပွင့်တွေ ထွက်လာလိုက်နဲ့
ဟော...နောက်ဆုံး
ငှက်အဖြူလေးတစ်ကောင် ဖြစ်သွားပြီး
ဟိုး...အဝေးကြီးကို ပျံသန်းပျောက်ကွယ်သွားတယ်။
(၃)
ဘာမှမကျန်ခဲ့တော့ဘူး။
(၄)
အစကတည်းကလည်း
ဘာမှ ရှိနေခဲ့တာ မဟုတ်ပါဘူး။
(၅)
မလိမ်မိုး မလိမ်မာနဲ့...ငါကသာ
မင်းကို အခါခါယုံခဲ့တယ်။
စုန်းသွင်းခံထားရသူတစ်ယောက်လိုကို
ယုံခဲ့တယ်။
..........
ငါ့ အိမ်မက်တောင်ယာကို ခုတ်လှဲ
အလွမ်းတွေကိုမှ ပျိုးကြဲသွားခဲ့တဲ့
လူကြီးလူကောင်း ငနဲမလေးရေ...
ဟောဒီမှာ...ငါဆိုတဲ့ကောင်က
မီးကျွမ်းခံထားရတဲ့ စာရွက်တစ်ရွက်လို
လေတစ်ချက် တိုက်ခတ်လိုက်ရုံနဲ့
စိပ်စိပ်မွှာမွှာ ပဲ့ကြွေလွင့်စင်သွားရတော့မယ်။
(၆)
မင်းရဲ့ မျက်လှည့်သေတ္တာထဲက
နောက်ထပ်...ဘာတွေများ ဆွဲထုတ်ပြဦးမှာလဲ?
(၇)
ကောင်မလေးရယ်...
ပြောပါ...
ငါ ရပ်နေရမှာလား
ဆက်လျှောက်ရမှာလား ဆိုတာကို။
( မင်းခိုက်စိုးစန် )
No comments:
Post a Comment